‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วลฺลิการผลทายโก เถโร อิมา
คาถาโย อภาสิตฺถาติฯ
วลฺลิการผลทายกตฺเถรสฺสาปทานํ อฏฺฐมํฯ
9. ปานธิทายกตฺเถรอปทานํ
[71]
‘‘อโนมทสฺสี ภควา, โลกเชฏฺโฐ นราสโภ;
ทิวาวิหารา นิกฺขมฺม, ปถมารุหิ [ปีติมารุยฺหิ (สฺยา.)] จกฺขุมาฯ
[72]
‘‘ปานธิํ สุกตํ คยฺห, อทฺธานํ ปฏิปชฺชหํ;
ตตฺถทฺทสาสิํ สมฺพุทฺธํ, ปตฺติกํ จารุทสฺสนํฯ
[73]
‘‘สกํ จิตฺตํ ปสาเทตฺวา, นีหริตฺวาน ปานธิํ;
ปาทมูเล ฐเปตฺวาน, อิทํ วจนมพฺรวิํฯ
[74]
‘‘‘อภิรูห มหาวีร, สุคตินฺท วินายก;
อิโต ผลํ ลภิสฺสามิ, โส เม อตฺโถ สมิชฺฌตุ’ฯ
[75]
‘‘อโนมทสฺสี ภควา, โลกเชฏฺโฐ นราสโภ;
ปานธิํ อภิรูหิตฺวา, อิทํ วจนมพฺรวิฯ
[76]
‘‘‘โย ปานธิํ เม อทาสิ, ปสนฺโน เสหิ ปาณิภิ;
ตมหํ กิตฺตยิสฺสามิ, สุณาถ มม ภาสโต’ฯ
[77]
‘‘พุทฺธสฺส คิรมญฺญาย, สพฺเพ เทวา สมาคตา;
อุทคฺคจิตฺตา สุมนา, เวทชาตา กตญฺชลีฯ
[78]
‘‘ปานธีนํ ปทาเนน, สุขิโตยํ ภวิสฺสติ;
ปญฺจปญฺญาสกฺขตฺตุญฺจ, เทวรชฺชํ กริสฺสติฯ
[79]
‘‘สหสฺสกฺขตฺตุํ ราชา จ, จกฺกวตฺตี ภวิสฺสติ;
ปเทสรชฺชํ วิปุลํ, คณนาโต อสงฺขิยํฯ
[80]
‘‘อปริเมยฺเย อิโต กปฺเป, โอกฺกากกุลสมฺภโว;
โคตโม นาม โคตฺเตน [นาเมน (สพฺพตฺถ)], สตฺถา โลเก ภวิสฺสติฯ
[81]
‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, นิพฺพายิสฺสตินาสโวฯ
[82]
‘‘เทวโลเก มนุสฺเส วา, นิพฺพตฺติสฺสติ ปุญฺญวา;
เทวยานปฏิภาคํ, ยานํ ปฏิลภิสฺสติฯ
[83]
‘‘ปาสาทา สิวิกา วยฺหํ, หตฺถิโน สมลงฺกตา;
รถา วาชญฺญสํยุตฺตา, สทา ปาตุภวนฺติ เมฯ
[84]
‘‘อคารา นิกฺขมนฺโตปิ, รเถน นิกฺขมิํ อหํ;
เกเสสุ ฉิชฺชมาเนสุ, อรหตฺตมปาปุณิํฯ
[85]
‘‘ลาภา มยฺหํ สุลทฺธํ เม, วาณิชฺชํ สุปฺปโยชิตํ;
ทตฺวาน ปานธิํ เอกํ, ปตฺโตมฺหิ อจลํ ปทํฯ
[86]
‘‘อปริเมยฺเย อิโต กปฺเป, ยํ ปานธิมทาสหํ;
ทุคฺคติํ นาภิชานามิ, ปานธิสฺส อิทํ ผลํฯ
[87]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[88]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[89]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปานธิทายโก เถโร อิมา คาถาโย
อภาสิตฺถาติฯ
ปานธิทายกตฺเถรสฺสาปทานํ นวมํฯ
10. ปุลินจงฺกมิยตฺเถรอปทานํ
[90]
‘‘มิคลุทฺโท ปุเร อาสิํ, อรญฺเญ กานเน อหํ;
วาตมิคํ คเวสนฺโต, จงฺกมํ อทฺทสํ อหํฯ
[91]
‘‘อุจฺฉงฺเคน ปุลินํ [ปุฬินํ (สี. สฺยา. ปี. ก.)] คยฺห, จงฺกเม โอกิริํ อหํ;
ปสนฺนจิตฺโต สุมโน, สุคตสฺส สิรีมโตฯ
[92]
‘‘เอกติํเส อิโต กปฺเป, ปุลินํ โอกิริํ อหํ;
ทุคฺคติํ นาภิชานามิ, ปุลินสฺส อิทํ ผลํฯ
[93]